Iâ-so͘

Iâ-so͘, iā ū kiò Iâ-so͘ Ki-tok, iok-lio̍k Chú-chiân 6 chì 4 nî chhut-sì, Chú-āu 30 nî kòe-sin.. Iâ-so͘ chiàu Ki-tok-kàu sī Sîn (Siōng-tè), koh sī Sîn ê kiáⁿ, i chiâⁿ chò lâng, lâi oân-sêng Sîn ê sū-kang. Sèng-keng kì i siū tèng Si̍p-jī-kè sí liáu-āu koh-oa̍h..

Chheng-ho͘

Iâ-so͘ tī Tâi-bûn iā ū kì Ia-so͘, Ji̍t-lâi-e̍k I-é-su iā I-é-suh.

Lâi-le̍k

Má-lī-a tùi Sèng Lêng siū-the, tī Pek-lī-hêng seⁿ Iâ-so͘, Thiⁿ-sài soan-pò͘ i ê chhut-sì, koh ū phok-sū tùi tang-pêng chah lé-bu̍t lâi pài-hóng. Chāi-tē ê thâu-lâng Hi-lu̍t ông chaiⁿ-iáⁿ tāi-chì beh thâi hit só͘-chāi ê âng-eⁿ-á, Iok-sek (Má-lī ê ang), Má-lī-a kap Ia-so͘ tô-siám khì Ai-ki̍p. Tè bóe in koh khì tī Ná-sat-le̍k, chia sī Iâ-so͘ tōa hàn ê só͘-chāi.

Sèng-keng lāi Iâ-so͘ sè-hàn sî ê kì-lio̍k khah chió, chóng ū siá i 12 hòe tī Ia-lō͘-sat-léng ê tiān kap kàu-su thó-lūn.

Iâ-so͘ kong-khai thoân-tō sī tùi i tī Iok-tàn Hô hō͘ Iok-hān sé-lé liáu-āu khai-sí. Hok-im-su kì hit chūn Thiⁿ-pē tùi thiⁿ téng soan-pò͘ "Chit ê sī Góa sim-ài ê Kiáⁿ, Góa chin-chiàⁿ kah-ì ê". Liáu-āu Ia-so͘ tī khòng-iá keng-kòe 40 kang kìm-chia̍h, khek ho̍k Mô͘-kúi ê chhì-thàm.

Thoân-tō kòe-têng tiong Iâ-so͘ tián-hiān sîn-chek, káng lūn Sîn ê kok-tō͘, hóe-kái, sìn-sim, ài, goân-liōng, téng-téng. I ū 12-ê tòe i ê sù-tô͘, pau-koat Pí-tek, Iok-hān téng-téng.

Chāi-tē chong-kàu ê thâu-lâng, chhin-chhiūⁿ Hoat-lī-sài-phài kap Sat-thó͘-kai-tóng téng-téng hoán tùi Iâ-so͘, kóng I siat-to̍k, hoān lu̍t-hoat. Koh hō͘ Iû-tāi hoán-pōe, Iâ-so͘ hông lia̍h khì hō͘ Lô-má Chóng-tok Pí-lia̍p-to kap chāi-tē Iû-thài thâu-lâng sím-phòaⁿ. Sui-bóng chóng-tok chhōe bô chōe, Iâ-so͘ kàu bóe oân-ná hông phòaⁿ tèng si̍p-jī-kè.

Ia-so͘ kap nn̄g ê hoān-chōe ê lâng chò-hóe, tī in tiong-ng hông tèng sí tī si̍p-jī-kè. Siōng bóe i hoah "It-chhè lóng oân-sêng ā." Liáu-āu, i hông tâi tī bōng lāi.

Saⁿ kang āu, Lé-pài-ji̍t, i tùi sí koh oa̍h, tāi-seng khòaⁿ tio̍h i ê sī Boa̍t-tāi-lia̍p ê Má-lī-a chāi-lâi chi̍t tīn hū-jîn-lâng. Sòa lâi i hiòng sù-tô͘ chèng-bêng i ê koh oa̍h. Āu-bóe Ia-so͘ tī Kaⁿ-ná-soaⁿ seng-thian.