La̍t-thâu
La̍t-thâu (Eng-gí: energy) chiàu bu̍t-lí ê ha̍k-būn sī chò kang ê lêng-le̍k. Hêng-sek thang sī bī-hoat (potential), tōng-chok (kinetic), sio-jia̍t (thermal), tiān-khì (electrical), he̍k-chú (nuclear) téng-téng.
La̍t-thâu sī bô thang hó chhòng-chō iā sī siau-bia̍t, ta ē-tàng tùi chi̍t khoán thè-ōaⁿ chò lēng-gōa chi̍t khoán. Chit-ê goân-chek hō chò la̍t-thâu ê pó-siú-sèng, iā sī kóng jia̍t-le̍k-ha̍k tē-it lu̍t. Pí-lūn kóng, soaⁿ téng chi̍t lia̍p chio̍h-thâu chhu lo̍h khì soaⁿ-kha, tō sī chit lia̍p chio̍h tiàm tī koân tē ê bī-hoat la̍t-thâu choán chò tōng-chok la̍t-thâu. Chio̍h-á koh siū chó͘-tòng bān lo̍h--lâi kiam thoa thô͘ hoat-jia̍t kàu bóe tiāⁿ khì ê kòe-têng, tō sī tōng-chok la̍t-thâu choán chò sio-jia̍t la̍t-thâu.
Kok-chè Tan-ūi Hē-thóng (SI) lāi-té la̍t-thâu sī àn joule kè-sǹg. Chi̍t joule sī tāi-piáu chi̍t newton ê la̍t (force) tī chi̍t kong-chhioh hn̄g só͘ chò ê kang (work).